Hanuman Chalisa
श्री हनुमान चालीसा
॥दोहा॥
श्रीगुरु चरन सरोज रज निज मनु मुकुरु सुधारि ।
बरनउँ रघुबर बिमल जसु जो दायकु फल चारि ॥
बुद्धिहीन तनु जानिके सुमिरौं पवन-कुमार ।
बल बुधि बिद्या देहु मोहिं हरहु कलेस बिकार ॥
॥चौपाई॥
जय हनुमान ज्ञान गुन सागर । जय कपीस तिहुँ लोक उजागर ॥१॥
राम दूत अतुलित बल धामा । अञ्जनि-पुत्र पवनसुत नामा ॥२॥
महाबीर बिक्रम बजरङ्गी । कुमति निवार सुमति के सङ्गी ॥३॥
कञ्चन बरन बिराज सुबेसा । कानन कुण्डल कुञ्चित केसा ॥४॥
हाथ बज्र औ ध्वजा बिराजै । काँधे मूँज जनेउ साजै ॥५॥
सङ्कर सुवन केसरीनन्दन । तेज प्रताप महा जग बन्दन ॥६॥
बिद्यावान गुनी अति चातुर । राम काज करिबे को आतुर ॥७॥
प्रभु चरित्र सुनिबे को रसिया । राम लखन सीता मन बसिया ॥८॥
सूक्ष्म रूप धरि सियहिं दिखावा । बिकट रूप धरि लङ्क जरावा ॥९॥
भीम रूप धरि असुर सँहारे । रामचन्द्र के काज सँवारे ॥१०॥
लाय सञ्जीवन लखन जियाये । श्रीरघुबीर हरषि उर लाये ॥११॥
रघुपति कीह्नी बहुत बड़ाई । तुम मम प्रिय भरतहि सम भाई ॥१२॥
सहस बदन तुह्मारो जस गावैं । अस कहि श्रीपति कण्ठ लगावैं ॥१३॥
सनकादिक ब्रह्मादि मुनीसा । नारद सारद सहित अहीसा ॥१४॥
जम कुबेर दिगपाल जहाँ ते । कबि कोबिद कहि सके कहाँ ते ॥१५॥
तुम उपकार सुग्रीवहिं कीह्ना । राम मिलाय राज पद दीह्ना ॥१६॥
तुह्मरो मन्त्र बिभीषन माना । लङ्केस्वर भए सब जग जाना ॥१७॥
जुग सहस्र जोजन पर भानु । लील्यो ताहि मधुर फल जानू ॥१८॥
प्रभु मुद्रिका मेलि मुख माहीं । जलधि लाँघि गये अचरज नाहीं ॥१९॥
दुर्गम काज जगत के जेते । सुगम अनुग्रह तुह्मरे तेते ॥२०॥
राम दुआरे तुम रखवारे । होत न आज्ञा बिनु पैसारे ॥२१॥
सब सुख लहै तुह्मारी सरना । तुम रच्छक काहू को डर ना ॥२२॥
आपन तेज सह्मारो आपै । तीनों लोक हाँक तें काँपै ॥२३॥
भूत पिसाच निकट नहिं आवै । महाबीर जब नाम सुनावै ॥२४॥
नासै रोग हरै सब पीरा । जपत निरन्तर हनुमत बीरा ॥२५॥
सङ्कट तें हनुमान छुड़ावै । मन क्रम बचन ध्यान जो लावै ॥२६॥
सब पर राम तपस्वी राजा । तिन के काज सकल तुम साजा ॥२७॥
और मनोरथ जो कोई लावै । सोई अमित जीवन फल पावै ॥२८॥
चारों जुग परताप तुह्मारा । है परसिद्ध जगत उजियारा ॥२९॥
साधु सन्त के तुम रखवारे । असुर निकन्दन राम दुलारे ॥३०॥
अष्टसिद्धि नौ निधि के दाता । अस बर दीन जानकी माता ॥३१॥
राम रसायन तुह्मरे पासा । सदा रहो रघुपति के दासा ॥३२॥
तुह्मरे भजन राम को पावै । जनम जनम के दुख बिसरावै ॥३३॥
अन्त काल रघुबर पुर जाई । जहाँ जन्म हरिभक्त कहाई ॥३४॥
और देवता चित्त न धरई । हनुमत सेइ सर्ब सुख करई ॥३५॥
सङ्कट कटै मिटै सब पीरा । जो सुमिरै हनुमत बलबीरा ॥३६॥
जय जय जय हनुमान गोसाईं । कृपा करहु गुरुदेव की नाईं ॥३७॥
जो सत बार पाठ कर कोई । छूटहि बन्दि महा सुख होई ॥३८॥
जो यह पढ़ै हनुमान चालीसा । होय सिद्धि साखी गौरीसा ॥३९॥
तुलसीदास सदा हरि चेरा । कीजै नाथ हृदय महँ डेरा ॥४०॥
॥दोहा॥
पवनतनय सङ्कट हरन मङ्गल मूरति रूप । राम लखन सीता सहित हृदय बसहु सुर भूप ॥
Sri Hanuman Chalisa
Doha
Shri guru charan saroj raj, Nij manu mukura sudhaari
Barnau Rahubara Bimal jasu, Jo dayaku Phala Chari
Buddhi Heen Tanu Janike, Sumiro Pavan Kumar
Bal-Buddhi Vidhya Dehu Mohi, Harahu Kales Vikaar
Chopai
Jai Hanuman gyan gun sagar, Jai Kapis tihun lok ujagar
Ram doot atulit bal dhama, Anjaani-putra Pavan sut nama
Mahabir Bikram Bajrangi, Kumati nivar sumati ke sangi
Kanchan varan viraj subesa, Kanan Kundal Kunchit Kesha
Hath Vajra Aur Dhwaja Viraje, Kaandhe moonj janeu saaje
Sankar Suvan Kesri Nandan, Tej prataap maha jag vandan
Vidyavaan guni ati chatur, Ram kaaj karibe ko aatur
Prabhu charitra sunibe ko rasiya, Ram Lashan Sita man basiya
Sukshma roop dhari Siyanhi dikhava, Vikat roop dhari lank jarava
Bhima roop dhari asur sanhaare, Ramachandra ke kaj sanvare
Laye Sanjivan Lakhan Jiyaye, Shri Raghuvir Harashi ur laye
Raghupati kinhi bahut badai, Tum mam priya Bharat hi sam bhai
Sahas badan tumhro jas gaave, As kahi Shripati kanth lagaave
Sankadik Brahmaadi Muneesa, Narad-Sarad sahit Aheesa
Jam Kuber Digpaal Jahan te, Kavi kovid kahi sake kahan te
Tum upkar Sugreevahin keenha, Ram milaye rajpad deenha
Tumhro mantra Vibheeshan maana, Lankeshwar bhaye sab jag jana
Jug sahastra jojan par Bhanu, Leelyo tahi madhur phal janu
Prabhu mudrika meli mukh mahee, Jaladhi langhi gaye achraj naahi
Durgaam kaj jagat ke jete, Sugam anugraha tumhre tete
Ram duwaare tum rakhvare, Hot na agya binu paisare
Sab sukh lahe tumhari sarna, Tum rakshak kaahu ko dar naa
Aapan tej samharo aape, Teeno lok haank te kanpe
Bhoot pisaach nikat nahin aave, Mahavir jab naam sunavae
Naase rog hare sab peera, Japat nirantar Hanumat beera
Sankat te Hanuman chhudave, Man Karam Vachan dyan jo lave
Sab par Ram tapasvee raja, Tin ke kaj sakal tum saaja
Aur manorath jo koi laave, Soi amit jeevan phal paave
Chaaron jug partaap tumhara, Hai parsidhh jagat ujiyara
Sadhu Sant ke tum rakhware, Asur nikandan Ram dulaare
Ashta-sidhhi nav nidhi ke dhaata, As bar deen Jaanki mata
Ram rasayan tumhre paasa, Sada raho Raghupati ke daasa
Tumhare bhajan Ram ko pave, Janam-janam ke dukh bisraave
Ant-kaal Raghubar pur jayee, Jahan janm Hari-Bhakt Kahayee
Aur Devta Chitt na dharahi, Hanumat se hi sarva sukh karahi
Sankat kate mite sab peera, Jo sumire Hanumat Balbeera
Jai Jai Jai Hanuman Gosaain, Kripa Karahu Gurudev ki naain
Jo sat bar path kare koi, Chutehi bandi maha sukh hoi
Jo yeh padhe Hanuman Chalisa, Hoye siddhi saakhi Gaureesa
Tulsidas sada hari chera, Keeje nath Hriday mah dera
Doha
Pavan Tanay Sankat Haran, Mangal Murati Roop
Ram Lashan Sita Sahit, Hriday Basahu Sur Bhoop
